Монголын анхны LEED гэрчилгээтэй “Nexus EV Station” ашиглалтад орлоо: Орон даяар 111 сэргээгдэх эрчим хүчний цэнэглэх цогцолбор байгуулна
Нарны цахилгаан үүсгүүр болон батарей хуримтлуурын (BESS) системтэй, Монголын анхны ногоон барилгын LEED гэрчилгээтэй хурдан цэнэглэх “Nexus EV Station-Тасган” өртөө ашиглалтад орж, орон даяар 111 цэг байгуулах төсөл эхэллээ.
Монгол Улсад цахилгаан автомашины тоо сүүлийн жилүүдэд эрчимтэй өсөхийн хэрээр жолооч нарын өмнө тулгамддаг гол асуудал бол төвийн эрчим хүчний сүлжээнээс хамааралгүй, орон нутагт найдвартай ажиллах хурдан цэнэглэх дэд бүтэц юм. Энэхүү асуудлыг цогцоор нь шийдвэрлэх зорилготой, нарны эрчим хүч ба батарей хуримтлуурын систем хосолсон, Монголын анхны ногоон барилгын “LEED” гэрчилгээтэй “Nexus EV Station-Тасган” цогцолбор Улаанбаатар хотын Тасганы овоонд албан ёсоор үүд хаалгаа нээлээ.
Уг төслийг “MMS LLC” болон “MMS Engineering LLC” компаниуд Засгийн газрын “Чөлөөлье” үндэсний санаачилга болон “Ногоон чөлөөлөлт”-ийн хүрээнд хэрэгжүүлж байна.
720 kW суурилагдсан хүчин чадал ба хэт хурдан цэнэглэлт
Шинээр ашиглалтад орсон “Nexus EV Station-Тасган” өртөө нь техникийн болон технологийн хувьд дараах үзүүлэлтүүдтэй:
- Нарны хавтангийн хүчин чадал: 410 kW
- Батарей хуримтлуурын систем (BESS): 430 kWh
- Нийт суурилагдсан чадал: 720 kW
- Нэгэн зэрэг цэнэглэх боломж: 4 автомашин
Тус станцын өндөр чадлын цэнэглэгч хошуунууд нь цахилгаан автомашины төрөл, батарейн багтаамж болон цэнэгийн түвшнээс хамааран нэг автомашиныг 15-аас 45 минутад бүрэн хурдан цэнэглэх боломжийг олгодог.
Хамгийн онцлог нь нарны эрчим хүчээр цэнэг хуримтлуурын системийг цэнэглэж, шаардлагатай үед автомашинуудыг ухаалгаар цэнэглэх зарчмаар ажилладаг тул өвлийн оргил ачааллын үед нийслэлийн төвийн цахилгаан сүлжээнд нэмэлт дарамт учруулахгүй давуу талтай юм.
Орон даяар 111 цогцолбор: Хөдөө орон нутагт 83, нийслэлд 28 цэг
“Nexus EV Station” төсөл нь зөвхөн нийслэлээр хязгаарлагдахгүй бөгөөд 2030 он хүртэл Монгол орны төв суурин газрууд, эдийн засгийн гол коридорууд, аялал жуулчлалын үндсэн чиглэлүүд, хилийн боомтууд болон уул уурхайн бүсүүдийг хамруулан нийт 111 байршилд байгуулагдана.
Төлөвлөлтийн дагуу:
- Хөдөө орон нутагт: 83 байршил
- Улаанбаатар хотын бүсэд: 28 байршил
Энэхүү сүлжээ бүрэн ашиглалтад орсноор Монгол Улсын нийт газар нутгийн 90 хүртэлх хувьд цахилгаан автомашинаар чөлөөтэй зорчих боломж бүрдэнэ. Түүнчлэн улсын хэмжээнд зам дагуу 150 километр тутамд “Ногоон өртөө” байгуулж, хөдөө орон нутагт нийт 500 түргэн цэнэглэх станцын экосистем бий болгох урт хугацааны төлөвлөгөөтэй уялдан ажиллаж байна.
Монголын EV эзэмшигчдэд ямар ач холбогдолтой вэ?
Өнөөдрийг хүртэл манай улсын EV жолооч нарын 90 гаруй хувь нь зөвхөн гэртээ эсвэл цөөн тооны хотын төвийн цэнэглэгч дээр дугаарлан цэнэглэдэг байсан бөгөөд хөдөө орон нутаг руу холын замд гарахад цэнэг дуусах айдас (range anxiety) хамгийн том саад болдог байв.
Сэргээгдэх эрчим хүчний тархмал эх үүсвэртэй ийм цогцолборууд олноор бий болсноор:
- Холын замын аялал бодитой болно: Хөдөө орон нутгийн коридоруудад байрлах өртөөнүүдээр дамжин хөдөө явах, аялах бүрэн гарц нээгдэнэ.
- Цаг хэмнэнэ: 15–45 минутын DC хурдан цэнэглэлтээр аяны замд богино хугацаанд цэнэгээ дүүргэнэ.
- Цэвэр ногоон эрчим хүч: Нүүрсний цахилгаан станцын эрчим хүчнээс хамааралгүйгээр нарны цэвэр эрчим хүчээр автомашинаа цэнэглэх бодит нөхцөл бүрдэж байна.
Эх сурвалж: Bloomberg TV Mongolia, Eguur.mn