-10°C хүйтэнд 98% багтаамжаа хадгалдаг батарей: Тансаг зэрэглэлийн цахилгаан жийп Hongqi Tiangong 08 танилцуулагдлаа
FAW Hongqi брэнд хүйтэн цаг агаарт зориулсан хувьсгалт батарейн технологи, 800V өндөр хүчдэлийн системтэй, 730 км хүртэл туулах чадвартай тансаг зэрэглэлийн Tiangong 08 бүрэн цахилгаан жийпээ урьдчилсан захиалгад гаргалаа.
Хятадын автомашин үйлдвэрлэлийн ууган брэнд болох FAW Hongqi тансаг зэрэглэлийн цоо шинэ бүрэн цахилгаан жийп Tiangong 08-аа албан ёсоор танилцуулж, Гуанжоугийн олон улсын авто үзэсгэлэнгийн үеэр урьдчилсан захиалгыг нь авч эхэллээ.
Энэхүү загвар нь урьдчилсан байдлаар дотоодын зах зээлдээ 239,800 юаниас (ойролцоогоор 32,900 ам.доллар) эхлэх үнэтэй гарч байгаа бол олон улсын зах зээлд Hongqi E-HS7 нэрээр 53,999 еврогоос эхлэн борлуулагдахаар төлөвлөгджээ. Tiangong 08 нь Hongqi-ийн цахилгаан машинд зориулсан шинэ үеийн "Tiangong" модуль архитектур болон "Jiuzhang" ухаалаг үйлдлийн платформ дээр суурилсан анхны загвар юм.
Хүйтнийг үл ажрах шинэ батарей ба 730 км туулах зай
Цахилгаан машин эзэмшигчдийн хувьд хамгийн эмзэг асуудал бол өвлийн хүйтэнд батарейн цэнэг болон туулах зай огцом буурах явдал байдаг. Тэгвэл Hongqi брэнд Tiangong 08 дээр өөрсдийн хөгжүүлсэн бага температурын тэсвэртэй шинэ үеийн батарейн технологийг анхлан нэвтрүүлжээ. Үйлдвэрлэгчийн мэдээлснээр уг батарей нь -10°C хүйтэнд нийт багтаамжийнхаа 98%-ийг, харин -20°C-т 85%-ийг тогтвортой хадгалах онцгой чадвартай.
Хэрэглэгчид өөрсдийн хэрэгцээнд нийцүүлэн хэд хэдэн батарейн сонголтоос сонгох боломжтой:
- 75 кВт.ц (LFP): 520 км хүртэл туулах зай (CLTC)
- 85 кВт.ц: 605–670 км туулах зай (CLTC)
- 111 кВт.ц (Ternary Lithium): Нэг мотортой RWD хувилбарт 730 км, хос мотортой бүх дугуйн хөтлөгчтэй AWD хувилбарт 680 км туулах чадвар.
Үүнээс гадна тус жийп нь 800V-ийн өндөр хүчдэлийн архитектуртай бөгөөд 4C хурдан цэнэглэлтийг дэмждэг. Мөн Nio-ийн батарей солих нэгдсэн сүлжээг ашиглан батарейгаа зориулалтын станц дээр солиулах (battery swap) боломжтой хувилбараар давхар гарах юм.
619 морины хүч, 3.9 секунд ба 95 мм өсөх хийн түдгэлзүүлэлт
Tiangong 08 нь гадаад хэмжээгээрээ 4925 мм урт, 1950 мм өргөн, 1680 мм өндөр бөгөөд тэнхлэг хоорондын зай нь бүтэн 3000 мм хүрдэг том оврын 5 хүний суудалтай жийп юм.
Хөдөлгүүрийн хувьд хоёр үндсэн сонголттой:
- RWD (Хойд хөтлөгчтэй): 253 кВт (344 м.х.) чадалтай цахилгаан мотор, 450 Нм эргүүлэх хүчтэй.
- AWD (Бүх дугуйн хөтлөгчтэй): Урд тэнхлэгт 202 кВт, хойд тэнхлэгт 253 кВт мотор суурилуулж, нийлбэр дүнгээрээ 455 кВт (619 м.х.) чадал, 756 Нм эргүүлэх хүч гаргана. Энэхүү хувилбар нь 0-100 км/цаг хурдыг ердөө 3.9 секундэд авдаг.
Түүнчлэн энэхүү жийпэд хойд дугуйн эргэх өнцгийг удирдах систем (rear-wheel steering) болон замын гадаргууд тааруулан газраас тэнхлэг хүртэлх өндрийг 95 мм хүртэл өөрчлөх хийн түдгэлзүүлэлт (air suspension) суурилуулжээ. Энэ нь хотод маневрлах болон бартаат замд саадгүй явахад томоохон давуу тал болно.
"Lingxi" тансаг салон ба ухаалаг жолоодлого
Автомашины дотор засалд нэгэн хэвийн дөрвөлжин дэлгэцээс татгалзаж, долгион хэлбэртэй дижитал хянах самбар болон голын дэлгэцийг нэгтгэсэн шинэлэг загварыг сонгожээ. Салхины шилэн дээр мэдээлэл дүрслэх 65 инчийн AR-HUD (Augmented Reality Head-Up Display) систем нь мэдээллийг жолоочийн нүднээс 4 болон 7.5 метрийн хос фокусын түвшинд тод харуулна.
Мөн "Hongqi No. 1" процессороор ажилладаг "Sinan Intelligent Driving" жолоодлогын туслах систем нь автомат зогсоол, замын нөхцөлийг урьдчилан таньж тохируулах L2+ түвшний ухаалаг жолоодлогын боломжуудыг олгодог байна.
Монголын зах зээлд ямар ач холбогдолтой вэ?
Монгол орны өвлийн улиралд температур -20°C-аас доош унах үед цахилгаан машины батарей хурдан царцаж, туулах зай тал хувь хүртэл буурдаг нь хэрэглэгчдийн гол асуудал байдаг. Hongqi Tiangong 08-ийн танилцуулсан бага температурын хамгаалалттай шинэ батарей нь яг энэ сул талыг шийдвэрлэхэд чиглэсэн нь Монголын нөхцөлд маш том дэвшил юм.
Дээр нь 111 кВт.ц том батарейн нөөц, 4WD бүх дугуйн хөтлөгч, өндрөө 95 мм өсгөдөг хийн түдгэлзүүлэлт зэрэг нь манай улсын цас мөстэй зам, хөдөөгийн бартаат чиглэлд ч найдвартай аялах боломжийг бүрдүүлж чадахаар байна.
Эх сурвалж: CarNewsChina, Inside China Auto, BitAuto