5 минутад 70% цэнэглэнэ: BYD нарны эрчим хүч, робот хосолсон хэт хурдан цэнэглэгчээ танилцууллаа
BYD компани Арабын Нэгдсэн Эмират Улсын Абу Даби хотын цөлд нарны эрчим хүч, батерейн хуримтлуур болон автомат робот хосолсон “FLASH Charging” цэнэглэх шинэ системээ албан ёсоор дэлгэлээ. Тус систем нь цахилгаан автомашиныг ердөө 5 минутад 10-аас 70 хувь хүртэл цэнэглэх хүчин чадалтай.
Цахилгаан автомашин үйлдвэрлэлээр дэлхийд тэргүүлэгчдийн нэг BYD компани цэнэглэх дэд бүтцийн салбарт шинэ жишиг тогтоох томоохон технологийн нээлтээ хийлээ. Арабын Нэгдсэн Эмират Улсын Абу Даби хотын элсэн цөлд байрлуулсан тус станц нь нарны цахилгаан станц, эрчим хүч хадгалах хуримтлуур (BESS), хэт өндөр хүчин чадалтай FLASH цэнэглэгч болон робот гарыг нэг дор цогцлоосон дэлхийн анхны систем болж байна.
Шатахуун авах хугацаатай эн зэрэгцэх "FLASH Charging"
Цахилгаан автомашин эзэмшигчдийн өмнө тулгардаг гол сорилтуудын нэг нь цэнэглэх хугацаа байсаар ирсэн. Харин BYD компанийн танилцуулсан FLASH Charging технологи нь бензин түгээгүүр дээр шатахуун шахах хугацаатай эн зэрэгцэх түвшинд хүрчээ.
Тус технологийн туршилтын үзүүлэлтээр:
- Тохирох өндөр хүчдэлийн системтэй автомашиныг 10%-аас 70% хүртэл ердөө 5 минутад,
- Харин 10%-аас 97% хүртэл 9 минутад бүрэн цэнэглэж байгааг онцолсон байна.
BYD-ийн Гүйцэтгэх дэд ерөнхийлөгч Стелла Ли (Stella Li) нээлтийн үеэр: “BYD компани нар, хуримтлуур болон FLASH Charging-ийг хослуулсан нэгдсэн технологийг дэлхийн тавцанд анх удаа гаргаж ирлээ. Бид цэвэр эрчим хүч үйлдвэрлэл, батерейн хадгалалт болон хэт хурдан цэнэглэлтийг нэгтгэснээр жолооч нарын цэнэглэх туршлагыг илүү ухаалаг, хялбар болгож байна” хэмээн мэдэгдэв.
Төвийн шугам хамаарахгүй нар ба хуримтлуурын (SSC) систем
Хэт өндөр чадлын (DC fast charging) станцуудыг олноор суурилуулахад тухайн бүс нутгийн төвийн эрчим хүчний сүлжээний ачаалал хамгийн том саад болдог. BYD энэхүү асуудлыг нарны дэлгэц болон өөрсдийн үйлдвэрлэсэн батерейн хуримтлуурын системээр (Solar-Storage-Charging) бүрэн шийджээ.
Элсэн цөлийн өндөр температур, нарны тусгалыг ашиглан өдрийн цагт эрчим хүч үйлдвэрлэн өндөр хүчин чадлын хуримтлуурт нөөцлөх ба автомашин залгагдах үед цахилгаан сүлжээнд хүчдэлийн огцом савалгаа үүсгэхгүйгээр мегаваттын өндөр чадлаар шууд цэнэглэх боломжийг олгож байна.
Жолооч буух шаардлагагүй: Робот залгагч гар
Энэхүү шинэ дэд бүтцийн бас нэгэн сонирхолтой дэвшил нь робот цэнэглэгч гар (Robotic Charging) юм. Цахилгаан машин зориулалтын зогсоолд ирж зогсоход дэвшилтэт мэдрэгч болон хиймэл оюунт камерын тусламжтайгаар робот гар автомашины цэнэглэгч портыг автоматаар нээж, холбогчийг залгадаг. Энэ нь цаг агаарын эрс тэс уур амьсгалтай нөхцөлд жолооч автомашинаасаа гарах шаардлагагүй, бүрэн автомат тухтай үйлчилгээг бүрдүүлжээ.
Монголын зах зээлд ямар ач холбогдолтой вэ?
Монгол Улсад сүүлийн жилүүдэд BYD болон Хятадын зах зээлийн бусад GB/T стандарттай цахилгаан автомашинууд түгээмэл нэвтэрч байгаа билээ. Манай орны өргөн уудам нутаг дэвсгэр, ялангуяа хөдөө орон нутгийн босоо тэнхлэгийн замуудад өндөр чадлын цэнэглэх станц тавихад цахилгаан дамжуулах төвийн шугамын хүчин чадал ихээхэн дутагддаг.
Абу Дабид туршигдсан нарны эрчим хүч ба батерейн хуримтлуурыг (BESS) хослуулсан бие даасан DC fast charging загвар нь Монголын орон нутгийн зам, уул уурхайн чиглэлд цэнэглэгч станцын сүлжээ байгуулахад хамгийн тохиромжтой шийдэл болж харагдаж байна. Мөн өвлийн хүйтэнд жолооч буухгүйгээр цэнэглэгдэх автомат гар болон хэт хурдан 5-9 минутын горим нь цахилгаан машины өдөр тутмын хэрэглээг эрс өөрчлөх ирээдүйтэй юм.
Эх сурвалж: Electric Cars Report / BYD Global Press